अभिनन्दित ज्येष्ठ नागरिकहरू,
राष्ट्रिय ज्येष्ठ नागरिक कोषका सभापति सहित कोष परिवाार,
कविता प्रतियोगितामा पुरस्कृत विद्यार्थीहरू,
उपस्थित भद्रमहिला तथा सज्जनवृन्द !
प्रथम राष्ट्रिय ज्येष्ठ नागरिक दिवस, २०७८ को अवसरमा स्वदेश तथा विदेशमा रहनु भएका सम्पूर्ण जेष्ठ नागरिकहरूमा सुस्वास्थ्य, दीर्घायु तथा मर्यादित जीवनयापनको लागि हार्दिक शुभकामना व्यक्त गर्दछु ।
यस अवसरमा, ज्येष्ठ नागरिकहरूमा निहित ज्ञान, सीप र अनुभवलाई उच्च मूल्याङ्कन गरी नयाँ पुस्तामा हस्तान्तरण गर्दै समाजको उत्थान र मुलुकको विकासमा सदुपयोग गर्न सम्बद्ध सबैमा आग्रह गर्दछु ।
यस दिवसको सन्दर्भ पारेर जेष्ठ नागरिकहरूको विषयमा बालबालिकाबीच सम्पन्न कविता प्रतियोगिताका विजेताहरूलाई पुरस्कार वितरण, सक्रिय ज्येष्ठ नागरिकहरूको अभिनन्दन तथा ज्येष्ठ नागरिकको अधिकारका क्षेत्रमा विशेष योगदान पु¥याउनु हुने व्यक्तित्वहरूलाई सम्मान गरिनु खुसीको विषय हो । यसका लागि सम्बद्ध सबैलाई म हार्दिक बधाई एवं शुभकामना दिन चाहन्छु ।
आफ्नो जीवनको महत्वपूर्ण समय परिवारको हेरचाह र पालनपोषणका साथै देश सेवामा समर्पण गर्ने ज्येष्ठ नागरिकहरू हाम्रा अभिभावक र ज्ञान तथा अनुभवका अजस्र स्रोत हुनुहुन्छ । तथापि नयाँ र पुरानो पुस्ता बीच पर्याप्त संवादको अभावका कारण आजभोलि परिवार र समाजमा विभिन्न प्रकारका समस्याहरू उत्पन्न हुने गरेका छन् । जसको कारण कतिपय ज्येष्ठ नागरिकहरूले अवहेलना र दुव्र्यवहार व्यहोर्न बाध्य हुनु परेको छ । यो कुरा हाम्रो मौलिक सांस्कृतिक परम्परा, पारिवारिक मूल्य, मान्यता र आदर्श विपरित छ । ज्येष्ठ नागरिकहरूलाई आघात् पु¥याउने यस प्रकारका प्रवृत्तिहरूलाई निरुत्साहित गरी सभ्य समाजको निर्माणमा क्रियाशील हुन सबैमा आव्हान गर्दछु ।
यस प्रकारका रचनात्मक कार्यमा राष्ट्रिय ज्येष्ठ नागरिक कोषजस्ता संघ संस्थाहरूले विशेष भूमिका निर्वाह गर्न सक्दछन् भन्ने मलाई लागेको छ । नेपाल सरकारले ज्येष्ठ नागरिकका लागि मासिक सामाजिक सुरक्षा भत्ताका साथै सार्वजनिक क्षेत्रका विभिन्न सेवामा छुट, सहुलियत र सुविधाको व्यवस्था गरेको छ । यी कानुनी र नीतिगत प्रावधानहरूको प्रभावकारी कार्यान्वयनको माध्यमबाट ज्येष्ठ नागरिकप्रति सम्मानित व्यवहार र सहज जीवनयापनमा सीमित भए पनि सहयोग पुग्ने मैले विश्वास लिएको छु ।
अन्तमा, अनुभव र प्रेरणाका स्रोत रहेका ज्येष्ठ नागरिकहरूलाई आदर, उचित संरक्षण र मर्यादित जीवनयापनमा सहजीकरण गर्न आजको दिनले हामी सबैलाई प्रेरणा प्रदान गर्ने अपेक्षा सहित पुनः म सम्मानित ज्येष्ठ नागरिकहरूप्रति सम्मान व्यक्त गर्दछु ।
धन्यवाद ।
२०७८ पुस ११ गते आइतबार ।
राष्ट्रपतिको कार्यालय, महाराजगन्ज, काठमाडौँ ।