माननीय युवा तथा खेलकुद मन्त्री‚
राष्ट्रिय ख्रीष्टियन महासंघ‚ नेपालका अध्यक्ष लगायत महासंघ परिवार,
भद्रमहिला तथा सज्जनवृन्द !
इसाई धर्मावलम्बीहरूको महान चाडको अवसरमा स्वदेश तथा विदेशमा रहनुहुने सम्पूर्ण नेपाली दिदीबहिनी तथा दाजुभाइहरूमा म सुख, शान्ति र समृद्धिको शुभकामना व्यक्त गर्दछु ।
हाम्रो मुलुक सांस्कृतिक एवम् भौगोलिक विविधताले भरिपूर्ण छ । विविधता हाम्रो कमजोरी होइन, बरु यो हाम्रो शक्ति हो । यही नै हाम्रो मौलिक राष्ट्रिय पहिचान पनि हो । विविधता बीचको एकता र सद्भावको यो गौरवपूर्ण परम्परालाई हामीले अक्षुण्ण राख्नु पर्दछ ।
आ–आफ्ना फरक आस्था र विश्वास बोकेका भएता पनि हामी सबै नेपाली हौँ । फरक आस्थाको कारणबाट आफ्नो देशप्रतिको माया र नागरिक दायित्वबोधमा कुनै तलमाथि हुन सक्दैन, रहेको पनि छैन ।
यस समुदायले शिक्षा, स्वास्थ्य र सामाजिक सेवाको माध्यमबाट मुलुकको विकास र समाजको अग्रगतिका लागि महत्वपूर्ण योगदान पु¥याउँदै आएकोमा धन्यवाद दिन चाहन्छु । हामीले आ–आफ्ना आस्था, विश्वास र पहिचानलाई कायम राख्दै आम जनताको जीवनस्तरलाई माथि उठाउँन सामाजिक न्यायसहितको आर्थिक समृद्धितर्फ अग्रसर हुनु पर्दछ ।
फरक आस्था र विश्वास बोकेका आफ्ना नागरिकप्रति राज्यका तर्फबाट समभाव र समव्यवहार गरिनु पर्दछ । हामी आफ्नो हात आफूलाई मन लागेजति फैलाउन स्वतन्त्र छौँ, तर त्यसले अरुको नाकमा ठेस पुग्नु हुँदैन भन्ने कुरामा हामी सबैले विचार पुर्याउँनु पर्दछ ।
हाम्रो देशमा मनाइने विभिन्न धार्मिक एवम् सांस्कृतिक चाडपर्वहरूले सम्पूर्ण नेपाली जनतामा आपसी सद्भाव‚ सहिष्णुता र एकताको भावनालाई सबल बनाउँदै र बृहत् राष्ट्रिय एकतालाई सुदृढ बनाउनमा योगदान गर्नेछ भन्ने विश्वास लिएको छु । साथै ‘समृद्ध नेपाल सुखी नेपाली’ को साझा राष्ट्रिय आकांक्षा पूरा हुने गरी प्रगति पथमा अघि बढ्न यस पर्वले सबैलाई उर्जा प्रदान गरोस् भन्ने शुभकामना व्यक्त गर्दछु ।
अन्तमा‚ यस महोत्सवमा सहभागी हुने अवसर दिनुभएकोमा आयोजक समितिलाई म हृदयदेखि नै धन्यवाद प्रकट गर्दछु ।
धन्यवाद ।
२०७८ साल पौष १० गते, शनिबार
नेपाल प्रज्ञा प्रतिष्ठान‚ कमलादी ।