जैन धर्मका प्रवर्तक महावीरको २६२०औँ जन्मजयन्तीका अवसरमा देश तथा विदेशमा रहनु भएका सम्पूर्ण जैन धर्मावलम्बी दिदीबहिनी तथा दाजुभाइहरूमा सुख‚ शान्ति र समृद्धिको हार्दिक शुभकामना व्यक्त गर्दछु ।
अहिंसा, त्याग एवं तपस्याको सन्देश दिनुहुने जैन धर्मका संस्थापक एवं धार्मिक गुरु वर्द्धमान महावीरको जन्म ५९९ ईसा पूर्वमा भएको थियो । प्रत्येक वर्ष चैत्र शुक्ल त्रयोदशीका दिन नेपाल लगायत विश्वभरि छरिएर रहेका जैन धर्मावलम्बीले भव्य रूपमा महावीर जयन्ती मनाउने गर्छन् । नेपालमा वैदिक, बौद्ध, जैन, शिख लगायत ओमकार परिवारका समुदायबाट प्रत्येक वर्ष उत्साहपूर्वक महावीर जयन्ती मनाउने गरिएको छ ।
महावीरले आफ्ना अनुयायीहरूका लागि मोक्षका पाँच मार्ग – अहिंसा‚ सत्य‚ अचौर्य (चोरी नगर्ने)‚ ब्रह्मचर्य र अपरिग्रह (सङ्ग्रह नगर्ने) देखाउनु भएको छ । उहाँले अहिंसा नै मानवको साँचो धर्म हो भन्ने आदर्शमाथि जोड दिनुहुँदै सानोभन्दा सानो जीवको समेत हत्या गर्नु हुँदैन भन्ने सन्देश दिनुभएको छ । यसबाट परिवार‚ समाज‚ राष्ट्र र विश्वमा नै द्वन्द्व र विग्रहको अन्त्य गरी शान्ति स्थापनामा मानव जातिलाई उत्प्रेरणा मिल्ने विश्वास लिएको छु ।
धार्मिक‚ सांस्कृतिक‚ भाषिक एवं भौगोलिक विविधतायुक्त इन्द्रेणी रूपी नेपाली समाजमा यस्ता पर्वहरूले आपसी सद्भाव‚ सहिष्णुता र बन्धुत्वको भावनालाई अभिवृद्धि गर्दै वृहत् राष्ट्रिय एकतालाई थप सुदृढ गर्न योगदान पुर्याउने छन् भन्ने कुरामा म विस्वस्त छु ।
अन्तमा‚ सामाजिक न्यायमा आधारित सभ्य र समृद्ध समाज निर्माणको बाटोमा अग्रसर हुन महावीर जयन्तीले सबैलाई प्रेरणा प्रदान गरोस् भन्ने हार्दिक शुभकामना व्यक्त गर्दछु ।
धन्यवाद ।
२०७८ साल वैसाख १२ गते आइतबार ।
