गण्डकी प्रदेशका माननीय प्रदेश प्रमुख‚
गण्डकी प्रदेशका माननीय मुख्यमन्त्री‚
पोखरा महानगरपालिकाका जनप्रतिनिधिहरू,
तमु धिँ, नेपालका संस्थापक अध्यक्ष,
राष्ट्र सेवकहरू,
तमु दिदीबहिनी तथा दाजुभाइहरू,
उपस्थित महिला तथा सज्जनवृन्द ।
सर्वप्रथम तमुहरूको महत्वपूर्ण सांस्कृतिक पर्व ट्होटेंको अवसरमा आयोजित यस उल्लासमय कार्यक्रममा सहभागी भई तपाईँहरूसँग सात्क्षात्कार गर्न पाउदा मलाई अत्यन्तै खुसी लागेको छ । ट्होटें पर्वको यस सुखद् अवसरमा सम्पूर्ण तमु समुदायमा म हार्दिक शुभकामना व्यक्त गर्दछु ।
गण्डकी प्रदेशको, खासगरी हिमाली भेग, गुरुङ भाषा र संस्कृतिको उद्गम स्थल मानिन्छ । यो क्षेत्र प्राकृतिक सम्पदा र जैविक विविधताले भरिपूर्ण छ । प्राचीनकालदेखि नै यहाँको माटो, ढुङ्गा, वन जङ्गल र कृषियोग्य जमिनमा मात्र होइन, नेपाली संस्कृतिको संरक्षण र संवर्द्धनमा पनि गुरुङहरूको महत्वपूर्ण योगदान रहेको छ ।
नेपाल राष्ट्रको एकिकरण प्रक्रियामा गुरुङ जातिको विशेष योगदान रहेको कुरा म स्मरण गर्न चाहन्छु । गुरुङ जातिको मौलिक भाषा, संस्कृति, रीतिरिवाज, चाडपर्व, गीत नाच एवं भेषभुषाले नेपाली राष्ट्रिय संस्कृतिलाई सबल र समृद्ध बनाउनमा ठूलो योगदान पुगेको छ भन्ने मलाई लागेको छ ।
तमुहरूको चाडपर्वमध्ये ट्होटे पनि एउटा मौलिक ऋतु पर्व हो । यो पर्वले नकारात्मक उर्जालाई हटाई सकारात्मक उर्जा दिने काम गर्दछ भन्ने मैले विश्वास लिएको छु । आफ्नो गाउँ, ठाउँ, वस्ती र अझ राज्यबाटै दोख, दोखालो, रोगव्याधी र अनिकाल भगाउन वर्षको दुइपटक ट्होटे पर्व मनाउने प्रचलन गुरुङ समाजमा विद्यमान छ । त्यसैले यो एउटा अँध्यारोबाट उज्यालो र रोग र शोकबाट स्वस्थ र सुखद् जीवनतर्फ लक्षित सांस्कृतिक प्रचलन हो भन्ने मेरो विश्वास रहेको छ ।
यस्तो राम्रो परम्परा र चलनलाई अब हामीले भूत, रोगव्याधी र दोख मात्र फाल्ने होइन, बरू हाम्रो समाजबाट सबै प्रकारका कुप्रथा, कुसंस्कार, अन्धविश्वास र पछौटेपन अन्त्य गर्न पनि ट्होटें जस्तो पर्वले थप उर्जा प्रदान गरेको छ ।
यस्ता हाम्रा धार्मिक, सांस्कृतिक पर्वहरूको संरक्षण र सम्बर्द्धन गर्दै जानुपर्ने आवश्यकता रहेको छ । हाम्रा मौलिक सांस्कृतिक परम्पराहरूलाई युवा पुस्तामा हस्तान्तरण गर्न समेत यस्ता पर्वले योगदान गर्दछ भन्ने मलाई लागेको छ ।
अन्त्यमा, राष्ट्रिय स्वतन्त्रता, स्वभिमान र मुलुकलाई समृद्धिको बाटोमा लैजाने तमुहरूको राष्ट्रिय भावनाको म हृदयदेखि प्रशंसा गर्न चाहन्छु । यस कार्यक्रममा मलाई पनि सहभागी हुने अवसर दिनुभएकोमा आयोजक तमु धिँ नेपाल परिवारलाई धन्यवाद दिन चाहन्छु ।
तमु धिँ‚ नेपालका अध्यक्ष हुमबहादुर गुरुङ अस्वस्थताका कारण यहाँ उपस्थित हुन नसक्नु भएको कुरा जानकारी भयो । म उहाँको शीघ्र स्वास्थ्य लाभको कामना गर्दछु ।
धन्यवाद ।
२०७९ साल श्रावण ३१ गते मङ्गलबार ।
नयाँ बजार‚ पोखरा ।