माननीय संस्कृति, पर्यटन तथा नागरिक उड्डयन मन्त्री,
ललितकला प्रज्ञा प्रतिष्ठानका कुलपति,
विभिन्न प्रतिष्ठानका कुलपतिहरू तथा अन्य पदाधिकारीहरु,
राष्ट्रसेवकहरू,
भद्र महिला तथा सज्जनवृन्द !
नेपाल ललितकला प्रज्ञा प्रतिष्ठानले राष्ट्रिय ललितकला प्रदर्शनी आयोजना गरेकोमा मलाई खुसी लागेको छ । देशभरिका विभिन्न विधाका प्रतिभावान कलाकारहरूले सृजना गरेका कलालाई राष्ट्रिय मञ्चमार्फत प्रदर्शन गरी थप उत्कृष्ट कला सृजनाका लागि प्रेरित गर्ने यस प्रतिष्ठानको कार्यको प्रशंसा गर्न चाहन्छु ।
कुनै पनि मुलुकको कलाको स्तरबाट त्यहाँको सभ्यताको विकास मापन हुन्छ । जीवनको अनुभव, समाज र प्रकृतिको संयोगबाट कलाको सृजना हुन्छ । त्यसैले कला सृजनामा जीवन र जीवनका रङ्गहरू हुन्छन् । प्राचीनकालदेखि नै जीवन र जगतलाई बुझ्न र बुझाउन मानव जातिले साहित्य र संगीत जस्तै ललितकलाको पनि साधना गर्दै आएका छन् । विविध सांस्कृतिक सम्पदायुक्त हाम्रो देश मौलिक कला र संस्कृतिले सम्पन्न छ । अनुपम प्राकृतिक सुन्दरताले सजिएको यहाँको परिवेशले सर्जकहरूलाई आफ्नो सिर्जना कार्यमा उत्प्रेरित गरिरहेको मैले महसुस गरेको छु । कला प्रष्फुटनका निम्ति प्राप्त यो वातावरणको थप उपयोग गर्न सम्बद्ध सबैको ध्यान पुग्नेनै छ ।
प्राचीनकालमा प्रसिद्ध कलाकार अरनिकोका कालजयी सृजनाले नेपालमा मात्र होइन विदेशमा पनि ख्याति कमाएका दृष्टान्तहरू हाम्रा सामू जीवित छन् । जीवन र जगतको रहस्य खोज्ने तथा बोध गराउने पौभा, थाङ्का, मण्डल, भित्ते चित्र, काष्ठकला, मूर्तिकला तथा ग्रन्थचित्रले हाम्रो समाजको विकासक्रम र परम्परालाई चित्रण गरेका छन् । मध्यकालमा रचना गरिएका वास्तुकलाका अद्वितीय सिर्जनाहरू हाम्रा सामू आजसम्म जीवन्त बनेर रहेका छन् । ललितकला प्रज्ञा प्रतिष्ठानले नेपाली मौलिक कलाको अध्ययन अनुसन्धान गर्न गराउन तथा विशुद्ध नेपाली पहिचानसहित अन्तर्राष्ट्रिय प्रतिष्ठा आर्जन गर्ने ललितकलाको विकास गर्न नेतृत्वदायी भूमिका खेल्नु पर्दछ । कलाकारहरूले विश्वका विभिन्न भागमा विकसित कलाका सिद्धान्त र प्रवृत्तिकोे अध्ययन गरी आफ्नै मौलिक सृजनाको माध्यमबाट देशको प्रतिष्ठा अभिवृद्धि गर्न अग्रसर हुनु पर्दछ । प्रतिष्ठान स्थापनाको वास्तविक उद्देश्य पनि यही हो भन्ने मलाई लागेको छ ।
हाम्रो मुलुक समृद्धि हासिल गर्ने साझा यात्रामा अघि बढिरहेको छ । यस संकल्पलाई सर्जक र कलाकारहरूले गहिरोसँग आत्मसात गर्दै देश विकास प्रक्रियामा सबैलाई थप जागरुक, जिम्मेवार र सक्रिय बनाउन लाग्नु पर्दछ भन्ने मलाई लागेको छ ।
विनासकारी भूकम्प तथा कोभिड—१९ महामारीले सृजना गरेका अनेकौं प्रतिकूलताका साथै स्रोत र साधनको सीमामा बाँधिएर पनि ललितकलाको विकासमा प्रतिष्ठानले उल्लेखनीय कार्यहरू गर्दै आएको छ । यस कार्यमा नेपाल सरकारबाट समेत निरन्तर सहयोग पुग्नेछ भन्ने कुरामा म विश्वस्त छु । आजको यस अवसरमा अरनिको राष्ट्रिय सम्मानद्वारा सम्मानित हुनुहुने स्रष्टाहरूलाई म हार्दिक बधाई दिन चाहन्छु ।
यस प्रदर्शनीमा समावेश गरिएका उत्कृष्ट कलाकृतिका स्रष्टालाई पुरस्कृत गर्नुका साथै प्रदर्शनीमा सहभागी सबै कलाकृतिहरू समावेश गरी कलाकारको परिचयसहितको पुस्तक (क्याटलग) प्रकाशन गरेकोमा प्रतिष्ठानको सराहना गर्न चाहन्छु । आज विभिन्न विधामा पुरस्कृत हुनुहुने सबै कलाकारहरू बधाईका पात्र हुनुहुन्छ । प्रदर्शनीमा सहभागी कलाकारहरूलाई भविष्यमा अझ उत्कृष्ट कला सृजना गर्न सफलता मिलोस् भनी म शुभकामना व्यक्त गर्दछु । यस प्रदर्शनीमा परिपक्व र परिष्कृत कलाकृतिदेखि युवा कलाकारका सृजना समेत समेटिएको मैले पाएको छु । तसर्थ यस प्रदर्शनीलाई अनुभव र आकांक्षाको मिलन विन्दु समेत मान्न सकिन्छ भन्ने मलाई लागेको छ । कला साधकहरूको उत्सवको रूपमा यो प्रदर्शनी सम्पन्न भई कलाकारहरू बिच सहकार्य अभिवृद्धि हुनका साथै ललितकलाको विकासमा थप नयाँ पाइला बन्न सकोस् भन्ने शुभेच्छासहित प्रदर्शनीको पूर्ण सफलताको शुभकामना व्यक्त गर्न चाहन्छु ।
अन्तमा, नयाँ वर्ष २०७८ ले हामी सबैमा सुस्वास्थ्य, शान्ति र समृद्धि प्रदान गरोस् भनी हार्दिक मंगलमय शुभकामना प्रकट गर्दछु ।
धन्यवाद !
२०७८ साल वैशाख २ गते बिहीबार ।