सोनम ल्होसार, २०७७ को शुभकामना सन्देश
तामाङ समुदायको नयाँ वर्षको रूपमा मनाइने सोनम ल्होसार पर्वको सुखद् अवसरमा स्वदेश तथा विदेशमा रहनुभएका सम्पूर्ण दिदीबहिनी तथा दाजुभाइहरूमा सुख, शान्ति र समृद्धिका लागि हार्दिक शुभकामना व्यक्त गर्दछु ।
चन्द्र पात्रोअनुसार प्रत्येक वर्ष माघ शुक्ल प्रतिपदाको दिन मनाइने यस पर्वमा तामाङ समुदायले कूल पूजा, प्रकृति पूजा र बुद्ध शिक्षाको स्मरण गर्नुका साथै आफन्तजन भेला भई भोजन एवम् मनोरञ्जन गर्दै आपसमा खुसी आदानप्रदान गर्ने प्रचलन रहिआएको छ । यो पर्व तामाङ जातिको बाहुल्यता रहेको बागमती प्रदेश लगायत देशका विभिन्न भागमा बसोबास गर्ने तामाङ सहित ह्योल्मो, थकाली, जिरेल, नेस्याङवा, भोटे, दुरा, लेप्चा आदि जातिहरूले आ-आफ्नै शैली र परम्पराअनुसार मनाउँदै आएको पाइन्छ ।
विविधतापूर्ण संस्कृति नेपालको मौलिक पहिचान र अमूल्य सम्पदा पनि हो । विविधतामा एकतामाथि गर्व गर्ने आधार हामीलाई यी चाडपर्वहरूले दिएका छन् । यस्ता पर्वहरूले हाम्रा मौलिक संस्कृति प्रवर्द्धन गर्न, सामुदायिक ऐक्यवद्धता एवं सामाजिक सद्भाव अभिवृद्धि गर्न र बृहत् राष्ट्रिय एकतालाई थप सुदृढ बनाउन महत्वपूर्ण भूमिका निर्वाह गर्दै आएका छन् ।
अन्त्यमा, सोनम ल्होसार पर्वले सबै नेपाली बिचको एकतालाई अझ सुदृढ गर्दै देशमा शान्ति, सद्भाव र सहिष्णुता कायम गरी आर्थिक, सामाजिक र सांस्कृतिक रूपले समृद्ध नेपाल निर्माण गर्न सबैमा प्रेरणा मिलोस् भन्ने शुभकामना व्यक्त गर्दछु ।
धन्यवाद ।
२०७७ साल माघ ३० गते, शुक्रबार ।
