नववर्ष २०७५ को सुखद अवसरमा स्वदेश तथा विदेशमा रहनुभएका सम्पूर्ण नेपाली दिदीबहिनी तथा दाजुभाइहरुमा सुख, शान्ति, सुस्वास्थ्य, दीर्घायु, भातृत्व, एकता एवम् समृद्धिका लागि हार्दिक शुभकामना व्यक्त गर्दछु ।
२०७४ हाम्रो देशको राजनीतिक इतिहासमा एउटा महत्वपूर्ण वर्ष रह्यो । नेपालको संविधानद्वारा निर्दिष्ट राज्य पुनःसंरचनाअन्तर्गतका संघीय संसद, प्रदेश सभा र स्थानीय तहका निर्वाचनहरु समावेशी र समानुपातिक सिद्धान्तका आधारमा शान्तिपूर्ण र उल्लासमय वातावरणमा सम्पन्न हुँदा सम्पूर्ण जनता हर्षित भएका छन् । विभिन्न तहका सरकार र संसदीय अभ्यासका अतिरिक्त स्थानीय तहमा न्यायिक समितिमार्फत न्याय निरुपणका प्रक्रियासमेत स्थानीयस्तरमै अघि बढेका छन् । यसबाट देशलाई लोकतान्त्रिक विधिबाट समृद्धिको दिशामा अघि बढ्ने ढोकालाई थप सृदृढ तुल्याएको छ। इतिहासमा पहिलोपटक भएका यसप्रकारका निर्वाचनहरुले संघीय लोकतान्त्रिक गणतन्त्रको जगलाई मजबूत बनाउन सफलता मिलेको छ । विभिन्न तहका जननिर्वाचित निकायहरुमा अभूतपूर्वरुपमा महिलाको प्रतिनिधित्व सुनिश्चित भएको छ ।
महत्वपूर्ण राजनैतिक एवं संवैधानिक परिवर्तनबाट अब देशलाई सामाजिक समानता एवम् आर्थिक समृद्धितर्फको यात्रा अगाडि बढाउने र संविधानले निर्दिष्ट गरेको समाजवादउन्मूख अर्थव्यवस्थासहित राष्ट्रलाई आत्मनिर्भर बनाउने अवसर प्राप्त भएको छ । फलतः समृद्ध नेपाल र सुखी नेपालीको जनआकांक्षालाई मूर्तरुप दिन सहजता उत्पन्न भएको छ । हाम्रो देशमा रहेका अथाह प्राकृतिक सम्पदा एवं मिहिनेती मानवीय संसाधनको समुचित र दीगो प्रयोग गर्दै आफ्नै पौरखले मुलुकलाई समृद्ध एवम् समुन्नत बनाउने दायित्व हाम्रो काँधमा रहेको छ ।
अन्तमा, समस्त नेपाली दिदीबहिनी तथा दाजुभाइहरुमा नववर्ष २०७५ ले खुशीको संचारसहित सुदृढ राष्ट्रिय एकता र आत्मीय सामाजिक सद्भावसहित आर्थिक समृद्धिको लागि नयाँ जोश, उमङ्ग र उत्साह पैदा गर्न सकोस् भन्ने शुभकामना प्रकट गर्दछु ।
धन्यवाद !
२०७५ साल वैशाख १ गते शनिबार ।