अन्तर्राष्ट्रिय ज्येष्ठ नागरिक दिवसको अवसरमा स्वदेश तथा विदेशमा बसोवास गर्ने सम्पूर्ण ज्येष्ठ नागरिकहरूको सुस्वास्थ्य, सुख, शान्ति र सम्मानित जीवनको लागि हार्दिक शुभकामना व्यक्त गर्दछु ।
यस वर्षको अन्तर्राष्ट्रिय ज्येष्ठ नागरिक दिवसको अवसरमा संयुक्त राष्ट्रले निर्धारण गरेको नारा समसामयिक छ । यस नारालाई सार्थक बनाउन हामीले सबै क्षेत्रमा ज्येष्ठ नागरिकको सम्मान गर्न जरूरी छ ।
सर्वप्रथम म ज्येष्ठ नागरिकको हक अधिकारका लागि अमूल्य योगदान दिने सबैलाई सम्मान अर्पण गर्दछु ।
यस दिवसको अवसरमा महिला, बालबालिका तथा ज्येष्ठ नागरिक मन्त्रालय र राष्ट्रिय ज्येष्ठ नागरिक महासंघको संयुक्त संयोजनमा ज्येष्ठ नागरिकको संरक्षण र सम्बर्द्धन सम्बन्धी विभिन्न कार्यक्रमहरू आयोजना गरी मनाउन लागेको जानकारी पाउँदा मलाई खुसी लागेको छ ।
जीवनको अधिकांश समय विभिन्न क्षेत्रमा क्रियाशील रही आफ्नो ज्ञान, सीप र अनुभवलाई समाज उपयोगी कार्यमा लगानी गर्नु भएका ज्येष्ठ नागरिकहरू निश्चय नै राष्ट्रका धरोहरका रूपमा आदरणीय हुनुहुन्छ ।
परिवारको लालनपालन, समाज सुधार र राष्ट्रोत्थानमा ज्येष्ठ नागरिकहरूले पुर्याउनु भएको योगदानको म उच्च मूल्यांकन गर्न चाहन्छु ।
अग्रज भनेका सिंगो राष्ट्रका अनुभवको जीउँदो प्रतिमूर्ति र इतिहास हुनुहुन्छ ।
ज्येष्ठ नागरिकहरुको अनुभवले आउने पुस्ता लाभान्वितहुने अवसर प्राप्त हुनेमा म विश्वस्त छु ।
ज्येष्ठ नागरिकको सम्मानमा नेपालको संविधानको मौलिक हकको व्यवस्थालाई व्यवहारमा कार्यान्वयन गर्न नेपाल सरकार अग्रसर रहेकोमा खुशी लागेको छ ।
यो महत्वपूर्ण दायित्व हासिल गर्न सम्बद्ध सबै पक्षले सहयोग पुर्याउन आग्रह गर्दछु ।
हाम्रो साँस्कृतिक मूल्य, परम्परा र दर्शन मातृदेवो भवः पितृ देवो भवः बाट निर्देशित छ । हाम्रा मौलिक मान्यताहरु आमरूपमा ज्येष्ठ नागरिकहरूप्रति सम्बेदनशील र सम्मानजनक छन् ।
आफूभन्दा अग्रजहरूको सम्मान गर्नु, सेवा गर्नु र उहाँहरूबाट आशिर्वाद ग्रहण गर्नु हाम्रो संस्कृतिको अभिन्न अङ्गको रूपमा रहेको छ ।
हाम्रो पूर्वीय दर्शनमा आधारित परिवारको स्वरूपमा माता-पिता, छोरा-छोरी, हजुरबा-हजुरआमा सँगसँगै तीन/चार पुस्ता एउटै परिवारमा बस्ने परम्परालाई कायम राख्न सके ज्येष्ठ नागरिकको आत्मसम्मान, सुरक्षाको प्रत्याभूति र आत्मविश्वास बढाउन सकिन्छ । यस्ता कुराले सभ्य समाज निर्माण गर्न मद्दत पुग्दछ ।
नेपालमा वि.सं. २०५१ सालबाट सुरु गरेको वृद्ध भत्ता, सम्मान कार्यक्रम सामाजिक सुरक्षाको एउटा नमूना हो ।
जेष्ठ नागरिकहरूलाई राज्यले दिने सामाजिक सुरक्षा भत्ता एउटा प्रतिकात्मक पाटो मात्र हो ।
त्यसलाई पनि जीवन उपयोगी रूपमा विस्तारित गर्दै लैजान सम्बद्ध पक्षको ध्यानाकर्षण गराउन चाहन्छु ।
यस कदमले जेष्ठ नागरिकहरूप्रति राज्य, समाज र परिवारको दृष्टिकोणमा सकारात्मक परिवर्तन ल्याउन र उहाँहरूको आत्मसम्मानमा वृद्धि गर्न ठूलो योगदान पुर्याउन सक्दछ भन्ने मेरो विश्वास छ ।
सार्वजनिक स्थल र सवारी साधनलगायत घरभित्रका संरचना सबै मानव जीवन चक्र उपयोगी हुनुपर्दछ ।
मनोरञ्जन स्थल, स्वास्थ्य केन्द्र, सार्वजनिक उद्यान, बगैँचा जस्ता सबै संरचनाहररू ज्येष्ठ नागरिकले सरल रूपमा उपयोग गर्न सक्ने किसिमबाट निर्माण गरिनुपर्दछ ।
देखासिकि गरेर बालबालिकाहरूलाई आफ्ना अभिभावकबाट छुट्याएर आवासीय विद्यालयमा राख्ने र आदर सम्मान गर्नुपर्ने बृद्ध बृद्धाहरूलाई बृद्धाश्रममा राख्ने प्रचलनलाई समाप्त पार्नु पर्दछ भन्नेमा हामी सबै एकमत हुन जरूरी छ ।
अन्तमा, पुनः सम्पूर्ण जेष्ठ नागरिकहरूप्रति उच्च आदरभाव प्रकट गर्दै यस्तो महत्वपूर्ण कार्यक्रम आयोजना गर्ने आयोजकलाई धन्यवाद दिन चाहन्छु ।
२०७६ साल असोज १४ गते मंगलबार ।