यस सभाका अध्यक्ष एवम् काठमाडौँ विश्वविद्यालयका उपकुलपति प्राध्यापक डाक्टर भोला थापाज्यू,
रजिस्ट्रार अच्युत वाग्लेज्यू,
नेपालका लागि गणतन्त्र कोरियाका महामहिम राजदूतज्यू,
कोइकाका प्रतिनिधिज्यू,
प्राध्यापकज्यूहरू तथा उपस्थित महानुभावहरू !
नेपालको विद्वत्वर्ग, कूटनीतिज्ञहरू, नीति निर्माता र खोज-अनुसन्धानदाताहरू उपस्थित यो विशेष समारोहबीच नेपाल टेक्नोलोजी इनोभेसन सेन्टर (NTIC) भवनको उद्घाटन गर्न आमन्त्रण गर्नुभएकोमा आयोजक काठमाडौँ विश्वविद्यालय परिवारलाई म धन्यवाद दिन चाहन्छु ।
आजको युग विज्ञान-प्रविधि, नवप्रवर्तन र उद्यमशीलताको हो । नेपाल अपेक्षित गतिमा विकासको मार्गमा अघि बढ्न नसक्नुको कारण इतिहासका महत्त्वपूर्ण कालखण्डमा यी क्षेत्रमा पर्याप्त लगानी गर्न, प्राविधिक, वैज्ञानिक एवम् व्यवस्थापकीय जनशक्ति उत्पादन गर्न र युगसापेक्ष प्रविधिको विकास गर्न पछि पर्नु नै हो । भविष्यको पुस्तालाई व्यापक र द्रूत आयाममा प्रविधिमय हुँदै गएको विश्वसँग प्रस्तिस्पर्धा गर्न सक्षम बनाउनुको विकल्प हामीसँग छैन । साथमा, मानव मस्तिष्कको क्षमताले व्यवस्थित गर्न सक्नेभन्दा छिटो गतिमा विश्वमा परिरहेको जलवायु परिवर्तन, भूमण्डलीकरण र कृत्रिम विद्वत्ताले मानव सभ्यताका सामु खडा गरेका चुनौतीलाई पनि पार लगाउँदै अगाडि बढ्नुपर्नेछ ।
मानवतामैत्री, दिगो र न्यायपूर्ण विकासका लागि खोज, अनुसन्धान, नवप्रर्वतन र प्रविधिका परिपूरक सहकार्यका अतिरिक्त वातावरण र मानवतासँग अन्योन्याश्रित सहसम्बन्ध हुनु अपरिहार्य छ । नेपालकै प्रविधि र नवप्रवर्तनका लागि नमुना आधुनिक केन्द्रका रूपमा स्थापित यस केन्द्रले यी सबै पक्षमा महत्त्वपूर्ण योगदान गर्नेछ ।
आज यस ल्त्क्ष्ऋ भवनको उद्घाटन गरिरहँदा मलाई यो हाम्रा लागि अनुसन्धान तथा नवीन प्रविधिको सुरुवात भएको एक ऐतिहासिक क्षण हो भन्ने महसुस भएको छ । यस अवसरमा विज्ञान तथा प्रविधिको विकासमा हाम्रा प्रयासहरूलाई सुदृढ पार्नका निमित्त मेरा दक्षिण कोरियाली समकक्षी महामहिम युन सुक येओल र दक्षिण कोरियाका जनताले नेपाललाई प्रदान गर्नुभएको निरन्तर सहयोगप्रति म धन्यवाद ज्ञापन गर्दछु ।
नेपालको प्राज्ञिक वातावरणमा प्रतिष्ठापूर्ण साख स्थापित गरेको काठमाडौँ विश्वविद्यालयको मातहत र व्यवस्थापनमा यो केन्द्र रहनुले यसले निरन्तर र फलदायी सञ्चालनको आधार पाएको अनुभूति मलाई भएको छ । यसको लाभ समग्र मुलुकले पाउनेछ ।
यस केन्द्रमा स्थापित कृषि, स्वास्थ्य र ऊर्जासम्बद्ध तीनवटै विशिष्टीकृत खोज–अनुसन्धान एकाइहरूले प्राज्ञिक प्रकृतिका अनुसन्धान कृति र आलेखहरू प्रकाशित गर्नुका अतिरिक्त समाज र राष्ट्रलाई प्रत्यक्ष उपयोगी हुने सीप, ज्ञान र दक्षता विकासमा पनि उत्तिकै योगदान गर्न सक्नुपर्छ ।
हामीलाई थाहा छ, हामी जनसाङ्ख्यिक लाभमा छौँ । करिब ६२ प्रतिशत आर्थिक रूपमा क्रियाशील हुने जनसङ्ख्या छ । यो जनसङ्ख्यालाई नवप्रवर्तन केन्द्रमार्फत इन्क्युवेसन सेन्टर चलाएर स्टार्टअपमा बिउ, पुँजी उपलब्ध गराई उद्यमशीलताको विकास गर्न सकिन्छ । उद्यमशीलता विकासशील अर्थतन्त्रको महत्त्वपूर्ण आधारशिला हो, जसबाट जागिर खोज्ने होइन जागिर दिने जनशक्ति उत्पादन गर्न सकिन्छ ।
मित्रराष्ट्र कोरिया र यसको विकास सहायता प्रदान गर्ने निकाय ‘कोइका‘ ले नेपालको आर्थिक-सामाजिक विकासमा निरन्तर महत्त्वपूर्ण योगदान गरेको छ । कोरिया आफैँ द्रूतगतिमा आर्थिक-सामाजिक विकासको उपल्लो उचाइ हासिल गर्ने थोरै उदाहरणीय मुलुकहरूमध्ये एक हो । आफ्नो संस्कृतिलाई अक्षुण्ण राखेर आधुनिक विकासमा फड्को मार्ने त्यहाँको अनुभवबाट नेपालले सिक्ने धेरै कुरा छन् भन्ने म ठान्दछु । यस केन्द्रको निर्माण र यसलाई अत्याधुनिक उपकरणहरूसमेतले सुसज्जित बनाउन मित्रराष्ट्र कोरियाले प्रदान गरेको सहयोगका लागि पनि म विशेष आभार प्रकट गर्न चाहन्छु ।
भविष्यमा पनि खोजअनुसन्धानका नतिजाहरू, अनुभव र स्रोतसाधनहरूको आदानप्रदानमार्फत यो केन्द्रको दिगो सञ्चालन एवम् नेपालका लागि प्रतिफलदायी परिणाम प्राप्त गर्ने दिशामा निरन्तर सहकार्य हुने नै छ ।
अन्त्यमा, म यो विद्वत्सभामा मेरो उपस्थितिलाई सम्भव बनाउनुहुने यसका उपकुलपति, रजिस्ट्रारलगायत सम्पूर्ण काठमाडौँ विश्वविद्यालय परिवार र कोरिया सरकारका प्रतिनिधिलाई विशेष धन्यवाद दिन चाहन्छु ।
जय नेपाल !
२४ असोज, २०८०
धुलिखेल