राष्ट्रियसभाका सम्माननीय अध्यक्ष,
पूर्व प्रधानमन्त्रीहरू,
माननीय मन्त्रीहरू,
माननीय प्रदेश मुख्यमन्त्रीहरू
मित्र राष्ट्रबाट पाल्नुभएका पर्यटनमन्त्रीहरू,
संवैधानिक आयोगका प्रमुखहरू,
माननीय सांसदहरू,
कूटनीतिक नियोगका पदाधिकारीहरू,
राष्ट्र सेवकहरू ,
सञ्चारकर्मीहरू,
उपस्थित भद्र महिला तथा सज्जनवृन्द,
पर्यटनलाई आर्थिक समृद्धिको आधारको रूपमा अंगीकार गरी राष्ट्रिय अभियानको रूपमा सञ्चालन गर्न लागिएको नेपाल भ्रमण वर्ष २०२० को पूर्ण सफलताको लागि शुभकामना व्यक्त गर्दछु ।
नेपालमा पर्यटन विकासको सन्दर्भमा आजबाट शुरु भएको यो अभियान सबैको सहयोग र सहभागितामा महाअभियानकै रूपमा अगाडि बढ्ने छ भन्ने विश्वास मैले लिएको छु ।
नेपाल संसारकै उत्कृष्ट पर्यटकीय गन्तव्य हो । हामी हाम्रा अमूल्य स्रोत र सम्भाव्यताहरूलाई मनन् मात्र हैन उजागर गर्न लागि लागिपरेका छौं । यो राष्ट्रिय अभियानलाई सफल पार्न हामी सबै नेपाली एकजुट भएर लाग्नु पर्ने आवश्यकता छ ।
विगत दुई दशकदेखि राजनीतिक द्वन्द्व र अस्थिरताले सिथिल भएको नेपालको सामाजिक-आर्थिक विकासको यात्रालाई हामी यस अभियानमार्फत् तीव्रता दिने लक्ष्यमा छौं ।
हाम्रो पर्यटन विकासको प्रारम्भिक अवस्थालाई हेर्ने हो भने अलि भिन्न स्थिति हामी पाउँछौँ ।
हामीले पर्यटक ल्याउने योजना बनाएर यहाँ पर्यटक आउन थालेको नभई पर्यटक आउन थालिसकेपछि त्यहीँअनुरुप आफूलाई तयार बनाउँदै गएको पाइन्छ ।
तर अब गन्तव्य-गन्तव्यबीच प्रतिस्पर्धा र रुचिमा विविधीकरणका कारण योजनाबद्ध पर्यटन विकास गर्न सकिएन भने पर्यटन उद्योगको दिगो विकासको कुरा कठिन बन्दै जानेछ ।
वास्तवमा आज पर्यटकहरू आरामदायी गन्तव्यभन्दा पनि नयाँ अनुभव अनुभूत गर्न पाइने गन्तव्य रोज्दै हिँड्ने गरेको पाइन्छ ।
हाम्रो देश सांस्कृतिक र प्राकृतिक हिसाबले विविधितायुक्त भएकाले हरेक खालका पर्यटकहरूलाई आकर्षित गर्नसक्ने क्षमता राख्दछ ।
यस सन्दर्भमा भ्रमण वर्ष २०२० को लक्ष्य हासिल गर्न सक्ने गरी हामीले काम गर्नु पर्दछ ।
संसारकै उत्कृष्ट गन्तव्य सगरमाथा र गौतम बुद्धको जन्मस्थल लुम्बिनी, चितवन र अन्नपूर्ण मात्रै हैन, पर्यटकहरूले अत्यन्तै चासोका साथ घुम्न रुचाउने थुपै्र गन्तव्य स्थलहरू हामीसँग छन् ।
हामी नेपालीहरूमा अन्तरनिहित ‘अतिथिदेवो भवः’को भावना पर्यटकहरूले सबैभन्दा बढी रुचाउने पक्ष हो । अतिथिलाई देवता सरह मान्ने हाम्रो यो असल संस्कृतिलाई हामीले जोगाई राख्नु पर्दछ । पर्यटन प्रवद्र्धन र विकासका लागि यो हाम्रो सबैभन्दा मार्मिक पक्ष हो भन्ने मलाई लागेको छ ।
हामीकहाँ भएका प्राकृतिक र सांस्कृतिक सम्पदाहरूलाई संरक्षण गरी पर्यावरणमैत्री बनाएर भौतिक सुविधाहरूलाई पनि यथेष्ट रूपमा विकास गर्न सक्नु पर्दछ । आधुनिक सुविधाका साथै प्राकृतिक र सांस्कृतिक सम्पदाहरूको सम्मिश्रणबाट पर्यटकलाई थप आकर्षित गर्न सकिन्छ ।
हामीसँग हिमाल, पहाड, नदीनाला, तालतलैया, पोखरी, गुफा र छहरा जस्ता प्राकृतिक सम्पदाहरू प्रचूर मात्रामा रहेकाले पदयात्रा, आरोहण र साहसिक खेलको प्रचुर सम्भावना रहेको छ । यसलाई हामीले भरपूर सदुपयोग गर्न आवश्यक छ ।
काम गरेपछि त्यसको प्रतिफल पाइन्छ भन्ने कुराको उदाहरण हामी आफैसँग छ । यसभन्दा पहिले बाह्य र आन्तरिक पर्यटन प्रवद्र्धन गर्ने हाम्रो अभियानका कारण मुलुकमा नयाँ गन्तव्यको विकास गर्न हामी सक्षम हुँदै गएका छौँ ।
यसै प्रयासस्वरुप अहिले देशका विभिन्न भागमा पर्यटन र पर्यावरणमैत्री होमस्टेहरू सञ्चालित भएका हुन् भन्ने मेरो बुझाइ छ ।
प्रकृतिलाई नासेर बिगारेर हैन, साँचेर सिँगारेर पर्यटन उद्योग र आर्थिक विकासका अभियानहरू सञ्चालन गरिनु पर्दछ । सकेसम्म पर्यटकहरूको खानपान र प्रयोगका वस्तुहरू देशभित्रै उत्पादन गर्ने सकेमा पर्यटन उद्योगबाट प्राप्त आम्दानी आम जनताको पहुँचमा पु¥याउन सकिन्छ ।
हामीले पर्यटन वर्ष २०२० मनाइरहँदा नाफा आर्जन र व्यवसाय अभिवृद्धि गर्ने सोंच मात्र हैन, त्यसको साथै यस अभियानले ‘बसुधैव कुटुम्बम्’ भन्ने हाम्रो आदर्शलाई आत्मसात गर्दै विश्वमा मानवता, भातृत्व र शान्तिप्रतिको हाम्रो प्रतिबद्धतालाई उजागर गर्ने उद्देश्य राख्नु पर्दछ ।
पर्यटन उद्योगको विकासमार्फत देशलाई समृद्ध बनाउने उद्देश्यका साथ अघि सारिएको भ्रमण वर्ष २०२० लाई सफल बनाउनु हामी सबैको दायित्व हो ।
हाम्रो यस अभियानलाई साथ दिन हाम्रा मित्रराष्ट्रहरूबाट पाल्नुभएका मित्रहरूको शुभेच्छाका लागि हार्दिक धन्यवाद दिन चाहन्छु । उहाँहरूको नेपाल बसाइ सुखद् रहोस् भन्ने कामना गर्दछु ।
पर्यटन वर्ष २०२० को सन्दर्भमा, पर्यटन क्षेत्रले समृद्ध नेपाल र सुखी नेपालीको राष्ट्रिय संकल्पका साथै दिगो विकासका लक्ष्यहरू समेत हासिल गर्न ठूलो योगदान पु¥याउने अपेक्षा राखिएको छ ।
अन्तमा, भ्रमण वर्ष २०२० शुभारम्भको यो पहिलो दिनमा अङ्ग्रेजी सम्वत्को नयाँ वर्षको पनि हार्दिक शुभकाना दिन चाहन्छु ।
धन्यवाद ।
दशरथ रंगशाला, २०७६ साल पौष १६ गते बुधबार