महिना: मार्च 2018

आज मिति २०७४ साल फागुन ३० गते बुधबारका दिन राष्ट्रपति भवन शीतलनिवासमा, नवनिर्वाचित सम्माननीय राष्ट्रपति श्रीमती विद्यादेवी भण्डारीज्यूले नेपालको संविधानको धारा ७१ बमोजिम सम्माननीय प्रधान न्यायाधीश श्री गोपाल पराजुलीज्यूसमक्ष राष्ट्रपति पदको पद तथा गोपनीयताको शपथ ग्रहण गर्नुभई आजैदेखि राष्ट्रपति पदको कार्यभार सम्हाल्नुभएको छ । (हरिप्रसाद दवाडी) प्रवक्ता

आज मिति २०७४ साल फागुन २७ गते आइतबारका दिन राष्ट्रपति भवन शीतलनिवासमा, सम्माननीय राष्ट्रपति श्रीमती विद्यादेवी भण्डारीज्यूसमक्ष प्रतिनिधि सभाको अन्तरिम कार्यविधि, २०७४ को दफा ८ बमोजिम सम्माननीय श्री कृष्णबहादुर महराज्यूले प्रतिनिधि सभाको सभामुख पदको पद तथा गोपनीयताको शपथ लिनुभएको छ ।  उक्त समारोहमा सम्माननीय उपराष्ट्रपतिज्यू, सम्माननीय प्रधानमन्त्रीज्यू, सम्माननीय प्रधानन्यायाधिशज्यू, माननीय मन्त्रीज्यूहरु, संवैधानिक निकायका प्रमुखहरु, प्रतिनिधि सभाका माननीय सदस्यहरु लगायत उच्च पदस्थ अधिकारीहरुको उपस्थिति थियो ।   (हरिप्रसाद दवाडी) प्रवक्ता

आज मिति २०७४ साल फागुन २२ गते मंगलबारका दिन राष्ट्रपति भवन, शीतलनिवासमा सम्माननीय राष्ट्रपति  श्रीमती विद्यादेवी भण्डारीज्यूसमक्ष नेपालको औपचारिक भ्रमणमा रहनुभएका मित्रराष्ट्र पाकिस्तानका प्रधानमन्त्री H.E. Mr. Shahid Khequan Abbasi ले शिष्टाचार भेट गर्नुभयो । सो अवसरमा दुई देशबीच रहि आएको सम्बन्ध, आपसी हित र चासोका बिषयमा कुराकानी भयो । उक्त भेटका अवसरमा माननीय अर्थ मन्त्री डा. युवराज खतिवडा, नेपाल सरकार तथा पाकिस्तान सरकारका उच्च पदस्थ अधिकारीहरु, नेपालस्थित पाकिस्तानका महामहिम राजदूत एवम् पाकिस्तानका लागी नेपालका राजदूत समेतको उपस्थिति थियो ।   (हरि प्रसाद दवाडी) प्रवक्ता

आज मिति २०७४ साल फागुन २० गते आइतबारका दिन राष्ट्रपति भवन शीतलनिवासमा, सम्माननीय राष्ट्रपति श्रीमती विद्यादेवी भण्डारीज्यूसमक्ष प्रतिनिधि सभा सदस्य निर्वाचन ऐन, २०७४ को दफा ७५ को उपदफा (१) को प्रतिवन्धात्मक वाक्यांश बमोजिम प्रतिनिधि सभाका ज्येष्ठ सदस्य माननीय श्री महन्थ ठाकुर र राष्ट्रिय सभा सदस्य निर्वाचन अध्यादेश, २०७४ को दफा ६७ को उपदफा (१) को प्रतिवन्धात्मक वाक्यांश बमोजिम राष्ट्रिय सभाका ज्येष्ठ सदस्य माननीय श्री तारादेवी भट्टज्यूले पद तथा गोपनीयताको शपथ लिनुभएको छ ।   (हरिप्रसाद दवाडी) प्रवक्ता