गुरुनानक जयन्तीको शुभकामना सन्देश
सिख धर्मावलम्बीहरूको विशेष पर्व गुरुनानक जयन्तीको पावन अवसरमा स्वदेश तथा विदेशमा रहनुहुने सम्पूर्ण सिख धर्मावलम्बी दिदीबहिनी तथा दाजुभाइहरूमा हार्दिक शुभकामना व्यक्त गर्दछु ।
सिख धर्मका प्रवर्तक गुरुनानकको जन्म वि.सं. १५२६ कार्तिक शुक्ल पूर्णिमाको दिन पाकिस्तानको पञ्जाब प्रान्तमा भएको थियो । सिख समुदायले हरेक वर्ष कार्तिक शुक्ल पूर्णिमाको दिन पवित्र स्थल गुरुद्वारामा विशेष पूजा अर्चना गर्दै विभिन्न धार्मिक एवं सामाजिक कार्यक्रमहरू गरी गुरुनानकको जन्मजयन्ती मनाउने गर्दछन् ।
सिखहरूको पवित्र धार्मिक ग्रन्थ ‘गुरु ग्रन्थ साहिब’ को रचना गर्नुहुने गुरुनानकले समाजमा व्याप्त अन्धविश्वास, घृणा र भेदभावको अन्त गरी समाजमा आपसी प्रेम र भ्रातृत्वको भावनालाई अभिवृद्धि गर्ने उद्देश्यले विनाभेदभाव निःशुल्क सामुदायिक भोजन गर्ने ‘लंगर परम्परा’ को थालनी गरेका थिए । निर्गुण उपासनाका पक्षपाती रहेका गुरुनानक ईश्वर एक छन्, उनी सर्वशक्तिमान् छन् र यही नै सत्य हो भन्ने कुरामा विश्वास गर्दथे । यसरी गुरुनानकले शान्ति, सहिष्णुता, एकता र लोक कल्याणका लागि सबै धर्महरूका बीचमा सद्भाव कायम राख्नुपर्ने कुरामा मार्गदर्शन गरेको पाइन्छ ।
धार्मिक, सामाजिक तथा सांस्कृतिक विविधता बीच सुदृढ एकता कायम गर्दै समाजमा विद्यमान जातीय विभेदको अन्त्य गरी सामाजिक न्याय, समानता र भ्रातृत्व कायम गर्न गुरुनानक जयन्तीबाट सबैलाई प्रेरणा मिल्नेछ भन्ने विश्वासका साथ पुन: हार्दिक शुभकामना व्यक्त गर्दछु ।
धन्यवाद ।
२०७७ मङ्सिर १५ गते, सोमबार ।
