राष्ट्रिय बाल दिवस, २०८३ को शुभकामना सन्देश
राष्ट्रिय बाल दिवस, २०८३ को अवसरमा समस्त नेपाली बालबालिका तथा अभिभावकहरूमा बधाई तथा सुख, शान्ति एवम् सु-स्वास्थ्यका लागि शुभकामना व्यक्त गर्दछु ।
नेपालले बाल अधिकारसम्बन्धी महासन्धी अनुमोदन गरेको दिनलाई आधार मानी हरेक वर्ष भदौ २९ गते राष्ट्रिय बाल दिवस मनाउने गरिन्छ । नेपालको संविधानले मौलिक हकको रूपमा बालबालिकाको हकलाई सुनिश्चित गरेको छ । बालबालिकाहरूका सम्बन्धमा व्यवस्था गरिएका राष्ट्रिय र अन्तर्राष्ट्रिय प्रतिवद्धताहरू तथा संवैधानिक कानूनी प्रावधानहरूको प्रभावकारी कार्यान्वयन गर्न सरकारी तथा गैरसरकारी निकाय, नागरिक समाज, अभिभावक, विद्यालय एवम् अन्य सरोकारवाला निकायहरूको एकिकृत र समन्वयात्मक भूमिका आवश्यक रहन्छ । बाल बालिकाको हितलाई प्राथमिकतामा राखी समाज र राज्यलाई सचेततापूर्वक कार्यसम्पादन गर्न यस दिवसले उत्प्रेरणा प्रदान गर्ने छ भन्ने विश्वास लिएको छु ।
बालबालिकामाथि हुने सबै किसिमका अमानवीय व्यवहार, हिंसा तथा दुर्व्यवहार रोक्नु सम्बन्धित सरोकारवालाहरूको दायित्व हो । बालबालिकाको भविष्य सुनिश्चित गर्न सिर्जनात्मक, व्यवहारिक, नि:शुल्क र गुणस्तरीय शिक्षाको व्यवस्था, पोषणयुक्त आहार, सुरक्षित खानेपानी र सरसफाई, आवश्यक खोप एवम् बालमैत्री स्वास्थ्य संस्था एवम् नीतिगत र कानूनी व्यवस्था गर्न आवश्यक छ । बालबालिकाहरूलाई घर, परिवार, विद्यालय र समुदायलगायत सार्वजनिक स्थानमासमेत सुरक्षित वातावरण सिर्जना गरी उनीहरूको संरक्षण, विकास र सहभागिताका लागि आ-आफ्नो तर्फबाट भूमिका निर्वाह गर्न यस दिवसले सहयोग पुग्ने अपेक्षा गरेको छु ।
अन्त्यमा, यस दिवसले बालबालिकाहरूको सर्वाङ्गिण विकासका लागि सम्बद्ध सबैमा थप प्रेरणा मिलोस् भन्ने कामना गर्दछु।
जय नेपाल !
२०८३ भदौ २९ गते सोमबार ।
ने.सं. ११४६ ञलाथ्व: तृतीया ।
