गौरा पर्व, २०८३ को शुभकामना सन्देश
गौरा पर्व, २०८३ को अवसरमा स्वदेश तथा विदेशमा रहनु भएका सम्पूर्ण नेपाली दिदीबहिनी तथा दाजुभाइहरूमा सुख, शान्ति र समृद्धिका लागि हार्दिक शुभकामना व्यक्त गर्दछु ।
हरेक वर्ष भाद्र शुक्ल पञ्चमीदेखि अष्टमीका दिनसम्म नेपालका मूलत: पश्चिमी तथा सुदूरपश्चिम क्षेत्रमा विशेष रुपमा मनाइने यस पर्वले भौगोलिक, धार्मिक, सांस्कृतिक आस्था र आपसी सद्भावलाई प्रगाढ बनाउन महत्त्वपूर्ण भूमिका निर्वाह गरेको छ । यस पर्वमा शिव र पार्वती (गौरा)को पूजा अर्चना गरी व्रत बस्ने गरिन्छ, जसको फलस्वरूप शिव र पार्वती तथा ईष्ट र कुल देवता प्रशन्न भई सुख, शान्ति, दीर्घायु र समृद्धि प्राप्त हुने जनविश्वास रहेको छ । यस पर्वमा गहुँ, धान, केराउ, मास र गहतजस्ता पाँच प्रकारका अन्नबाट बनेको “बिरुँडा” अर्पण गरी प्रसादको रुपमा ग्रहण गरेर मानवीय जीवन, कृषि संस्कृति र पारिवारिक समृद्धिको कामना गरिन्छ ।
यस पर्वको अवसरमा स्थानीयहरू गोलबद्ध भई लोक भाषामा देउडा, धमारी र चैत आदिका माध्यमबाट एक अर्काका दु:ख र सुख बाड्ने गर्दछन् । साथै, यस पर्वले बिछोडिएका जोडीहरूको मिलन हुने, आपसी भाइचाराको सम्बन्धमा वृद्धि हुने र पति-पत्नी बीचको सम्बन्ध अझ प्रगाढ हुने विश्वास रहेकोले यसलाई धुमधामपूर्वक मनाउने प्रचलन रहि आएको देखिन्छ ।
हाम्रो समाजमा रहेका यस्ता लोक परम्परा तथा सांस्कृतिक पर्वहरूले विविधतामा एकता, सामाजिक एवम् सांस्कृतिक ऐक्यवद्धता र सहिष्णुता अभिवृद्धि गरी परिवार र समाजलाई जोड्दै राष्ट्रिय एकता सुदृढ पार्न, संस्कृतिको संरक्षण गर्न तथा आध्यात्मिक आस्था र मानवीय जीवनको सुख शान्तिका लागि सहयोग पुर्याउँदै आएका छन् भन्ने मलाई लाग्दछ ।
अन्त्यमा, यस पर्वले नेपाली मौलिक संस्कृतिको संरक्षण तथा सम्वर्द्धनमा थप योगदान गर्न प्रेरणा मिलोस् भन्ने कामना गर्दछु ।
जय नेपाल !
२०८३ भदौ १९ गते शुक्रबार ।
ने.सं. ११४६ गुँलागा: अष्टमी ।
