फाल्गुनन्द जयन्तीको शुभकामना सन्देश
किराँत धर्मावलम्बीहरूका महागुरु फाल्गुनन्द जयन्तीको अवसरमा स्वदेश तथा विदेशमा रहनुभएका सम्पूर्ण दिदीबहिनी तथा दाजुभाइहरूमा सुख, शान्ति तथा समृद्धिका लागि हार्दिक शुभकामना व्यक्त गर्दछु ।
किराँत धर्म र संस्कृतिको मौलिक पहिचान र संरक्षणमा महत्त्वपूर्ण योगदान पुर्याउनु हुने राष्ट्रिय विभूति फाल्गुनन्दले समाज सुधारका लागि खेलेको अहम् भूमिकाको कदर गर्दै पूर्वी नेपालका विभिन्न जिल्लाहरूमा विशेष कार्यक्रमहरूको आयोजना गरी उहाँको जन्मजयन्ती मनाउने गरिन्छ । उहाँको मार्ग दर्शनले धार्मिक, सामाजिक तथा साँस्कृतिक विविधताबीच सहिष्णुता र सद्भाव कायम गर्दै राष्ट्रिय एकतालाई सुदृढ एवम् सबल बनाउन सकिने विश्वास मैले लिएको छु ।
महागुरु फाल्गुनन्दले धार्मिक गुरु तथा सामाजिक अभियन्ताको रूपमा समाज सुधारक भई धर्म, भाषा, लिपि, परम्पराको संरक्षण र विकासमा समेत कार्य गर्नु भएको पाइन्छ । सामाजिक रूढीवादीको अन्त्य गर्दै समाजलाई सही बाटो देखाउन उहाँले दिनुभएको मार्गनिर्देशले वर्तमान समाजलाई नैतिक, सभ्य र एकतावद्ध बनाउँदै आपसी सम्मान, मेलमिलाप र समाजसेवाको भावना अभिवृद्धि गर्न थप बल पुग्नेछ भन्ने मलाई लागेको छ ।
अन्त्यमा, फाल्गुनन्द जयन्तीले हामी सबैमा सहिष्णुता, सद्भाव, सुशासन, अहिंसा एवम् समाज सुधारको अभियानमा सक्रिय भईरहन थप प्रेरणा मिलोस् भन्ने कामना गर्दछु ।
जय नेपाल !
२०८२ साल कात्तिक २५ गते मङ्गलबार ।
ने.सं. ११४६ कछलागा षष्ठी ।
